1DEr Mensch setzt jm wol fur im hertzen / Aber vom HERRN kompt was die zunge reden sol. 2Ein jglichen düncken seine wege rein sein / Aber allein der HERR macht das hertz gewis. 3Befilh dem HERRN deine werck / So werden deine anschlege fort gehen. 4Der HERR macht alles vmb sein selbs willen / Auch den Gottlosen zum bösen tage. 5Ein stoltz Hertz ist dem HERRN ein grewel / Vnd wird nicht vngestrafft bleiben / wenn sie sich gleich alle an einander hengen. 6Durch güte vnd trew wird Missethat versünetBey Gott vnd Menschen / Denn Gott wendet die straffe / vnd Menschen werden freunde dadurch. / Vnd durch die furcht des HERRN meidet man das Böse. 7Wenn jemands wege dem HERRN wolgefallen / So macht er auch seine Feinde mit jm zu frieden. 8Es ist besser wenig mit gerechtigkeit / Denn viel einkomens mit vnrecht. 9Des Menschen hertz schlehet seinen weg an / Aber der HERR allein gibt / das er fort gehe. 10WEissagung ist in dem munde des KönigsDenn er richtet nach dem Recht oder Gesetz / welches Gott bestetigt vnd gebeut / als ein öffentlich Ampt. / Sein mund feilet nicht im Gericht. 11Rechte Wage vnd Gewicht ist vom HERRN / Vnd alle Pfunde im sack sind seine werck. 12Fur den Königen vnrecht thun / ist ein Grewel / Denn durch gerechtigkeit wird der Thron bestetigt. 13Recht raten gefellet den Königen / Vnd wer gleich zuret / wird geliebet. 14Des Königes grim ist ein Bote des todes / Aber ein weiser Man wird jn versünen. 15Wenn des Königes angesicht freundlich ist / das ist leben / Vnd sein gnade ist wie ein Abendregen. 16NJm an die Weisheit / denn sie ist besser weder gold / Vnd Verstand haben / ist edler denn silber. 17Der Fromen weg meidet das arge / Vnd wer seinen weg bewaret / der behelt sein Leben. 18Wer zu grund gehen sol / Der wird zuuor Stoltz / Hoffertig vnd stoltzer mut / kompt fur dem fall. 19Es ist besser nidriges gemüts sein mit den Elenden / Denn Raub austeilen mit den Hoffertigen. 20Wer eine Sache klüglich füret / der findet glück / Vnd wol dem / der sich auff den HERRN verlesst. 21Ein verstendiger wird gerhümet fur einen weisen Man / Vnd liebliche rede leren wol. 22Klugheit ist ein lebendiger brun / dem der sie hat / Aber die zuchtJre Lere / Weisheit / Heiligkeit etc.der Narren ist narheit. 23Ein weise Hertz redet klüglich / Vnd leret wol. 24Die rede des Freundlichen sind honig seim / Trösten die seele vnd erfrischen die gebeine. 25Manchem gefelt ein weg wol / Aber sein letztes reicht zum Tode. 26Mancher kompt zu grossem vnglück / Durch sein eigen maul. 27Ein loser Mensch grebet nach vnglück / Vnd in seinem maul brennet fewr. 28Ein verkereter Mensch richtet hadder an / Vnd ein Verleumbder macht Fürsten vneins. 29Ein Freueler locket seinen Nehesten / Vnd füret jn auff keinen guten weg. 30Wer mit den augen wincket / denckt nichts guts / Vnd wer mit den lippen deutet / volbringet böses. 31Grawe har sind ein Kron der ehren / Die auff dem weg der gerechtigkeit funden werden. 32Ein Gedültiger ist besser denn ein Starcker / Vnd der seines muts herr ist / denn der Stedte gewinnet. 33Los wird geworffen in den schos / Aber es fellet wie der HERR wil.