1Or touchant les temps et les momens, freres, vous n'avez point de besoin qu'on vous en escrive. 2Car vous-mesmes sçavez tres-bien que le jour du Seigneur viendra comme le larron en la nuit. 3Car quand ils diront, Paix et seureté, alors il leur surviendra une soudaine destruction, comme le travail à celle qui est enceinte, et ils n'eschapperont point. 4Mais quant à vous, freres, vous n'estes point en tenebres, de sorte que ce jour-là vous surprenne comme le larron. 5Vous estes tous enfans de lumiere, et enfans du jour: nous ne sommes point de la nuit, ni des tenebres. 6Ainsi donc ne dormons point comme les autres mais veillons et soyons sobres. 7Car ceux qui dorment, dorment de nuit: et ceux qui s'enyvrent, s'enyvrent de nuit. 8Mais nous qui sommes de jour, soyons sobres, estant revestus du corcelet de la foi et de la charité, et pour casque, de l'esperance de salut. 9Car Dieu ne nous a point ordonnez à ire, mais pour l'acquisition du salut par nostre Seigneur Jesus Christ; 10Qui est mort pour nous, afin que soit que nous veillons, soit que nous dormions, nous vivions avec lui. 11C'est pourquoi exhortez-vous l'un l'autre, et edifiez-vous chacun l'un l'autre, comme aussi vous faites. 12Or, freres, nous vous prions que vous reconnoissiez ceux qui travaillent entre vous, et qui president sur vous au Seigneur, et qui vous admonestent: 13Et que vous les ayez en souveraine amour pour l'oeuvre qu'ils font. Soyez en paix entre vous. 14Pareillement nous vous prions, freres, que vous admonestiez les déreglez: que vous consoliez ceux qui sont de petit courage: que vous soyez d'esprit patient envers tous. 15Avisez que nul ne rende à aucun mal pour mal: mais pourchassez toûjours ce qui est bon, tant les uns envers les autres, qu'envers tous. 16Soyez toûjours joyeux. 17Priez sans cesse. 18Rendez graces en toutes choses: car telle est la volonté de Dieu par Jesus Christ envers vous. 19N'esteignez point l'Esprit. 20Ne mesprisez point les propheties. 21Esprouvez toutes choses: retenez ce qui est bon. 22Abstenez-vous de toute apparence de mal. 23Or le Dieu de paix vous veuille sanctifier entierement: et vostre esprit entier, et l'ame, et le corps, soit conservé sans reproche à la venuë de nostre Seigneur Jesus Christ. 24Celui qui vous appelle est fidele, qui aussi le sera. 25Freres priez pour nous. 26Saluëz tous les freres, par un saint baiser. 27Je vous adjure par le Seigneur que cette Epistre soit leuë à tous les saints freres. 28La grace de nostre Seigneur Jesus Christ soit avec vous. Amen.