1J'admoneste donc qu'avant toutes choses on fasse des requestes, des supplications et des actions de graces pour tous les hommes: 2Pour les Rois, et pour tous ceux qui sont constituez en dignité, afin que nous puissions mener une vie paisible et tranquille, en toute pieté et honnesteté. 3Car cela est bon et agreable devant Dieu nostre Sauveur: 4Lequel veut que tous les hommes soyent sauvez, et viennent à la connoissance de la verité. 5Car il y a un seul Dieu, et un seul Moyenneur entre Dieu et les hommes, assavoir Jesus Christ homme: 6Qui s'est donné soi-mesme en rançon pour tous, afin d'estre en témoignage en son propre temps. 7A quoi j'ai esté establi Heraut et Apostre (je dis verité en Christ, je ne mens point) Docteur des Gentils en foi et en verité. 8Je veux donc que les hommes prient en tout lieu, levant leurs mains pures, sans colere, et sans question. 9Pareillement aussi que les femmes se parent d'un accoustrement honneste avec vergogne et modestie, non point avec tresses, ni or, ni perles, ni habillemens somptueux: 10Mais de bonnes oeuvres, comme il est seant à des femmes qui font profession de servir Dieu. 11Que la femme apprene en silence, en toute sujettion. 12Car je ne permets point que la femme enseigne, ni qu'elle use d'authorité sur le mari, mais qu'elle soit en silence. 13Car Adam a esté formé le premier, et puis apres Eve. 14Et ce n'a point esté Adam qui a esté seduit, mais la femme ayant esté seduite, a esté en transgression. 15Or elle sera sauvée en engendrant des enfans, si elle demeure en foi, dilection, et sanctification, avec modestie.