1Commençons-nous derechef à nous recommander nous-mesmes? Ou bien avons-nous besoin, comme quelques-uns, d'epistres recommandatoires de par vous? 2Vous estes nostre epistre, écrite en nos coeurs, laquelle est connuë et leuë de tous les hommes: 3Entant qu'il apparoit en vous que vous estes l'epistre de Christ, administrée par nous, et écrite non point d'encre, mais de l'Esprit du Dieu vivant: non point en des plaques de pierres, mais és plaques charnelles du coeur. 4Or nous avons une telle confiance en Dieu par Christ. 5Non point que nous soyons suffisans de penser quelque chose de nous, comme de nous-mesmes: mais nostre suffisance est de Dieu: 6Lequel aussi nous a rendus suffisans pour estre ministres du nouveau Testament: non pas de lettre, mais d'Esprit: car la lettre tuë, mais l'Esprit vivifie. 7Que si le ministere de mort escrit en lettres et gravé en pierres, a esté glorieux, tellement que les enfans d'Israël ne pouvoyent regarder en la face de Moyse pour la gloire de sa face; (laquelle gloire devoit prendre fin:) 8Comment est-ce que le ministere de l'esprit ne sera plus glorieux ? 9Car si le ministere de condamnation a esté glorieux, le ministere de justice le surpasse de beaucoup en gloire. 10Car mesmes ce qui a esté glorifié, n'a point esté glorifié en cet égard, à cause de la sureminente gloire. 11Car si ce qui devoir prendre fin a esté glorieux, ce qui est permanent, est beaucoup plus glorieux. 12Ayans donc une telle esperance, nous usons de grande hardiesse de parler. 13Et nous ne sommes point comme Moyse, qui mettoit un voile sur sa face, afin que les enfans d'Israël ne regardassent point à la fin de ce qui devoit étre aboli. 14Mais leurs entendemens sont endurcis: car jusques à ce jourd'hui ce mesme voile demeure en la lecture de l'ancien Testament, sans estre osté: (lequel est aboli par Christ:) 15Jusques à ce jourd'hui donc, quand on lit Moyse, le voile demeure sur leur coeur. 16Mais quand il se sera converti au Seigneur, le voile sera osté. 17Or le Seigneur est cet Esprit-là: et là où est l'Esprit du Seigneur, là est la liberté. 18Ainsi nous tous qui contemplons comme en un miroir la gloire du Seigneur à face découverte, sommes transformez en la mesme image de gloire en gloire, comme par l'Esprit du Seigneur.