1Je vous prie donc, moi le prisonnier au Seigneur, que vous cheminez dignement comme il est séant à la vocation à la vocation à laquelle vous estes appellés: 2Avec toute humilité et douceur, avec un esprit patient, supportans l'un l'autre en charité. 3Estans soigneux de garder l'unité de l'Esprit par le lien de la paix. 4Il y a un seul corps et un seul Esprit, comme aussi vous estes appellez en une seule esperance de vostre vocation. 5Il y a un seul Seigneur, une seule foi, un seul Baptesme. 6Un seul Dieu et Pere de tous, qui est sur tous, et parmi tous, et en nous tous. 7Mais la grace est donnée à chacun de nous, selon la mesure du don de Christ. 8Pour laquelle chose il dit, Estant monté en haut il a mené captive une grande multitude de captifs, et a donné des dons aux hommes. 9Or ce qu'il est monté, qu'est-ce autre chose sinon que premierement il estoit descendu és parties les plus basses de la terre? 10Celui qui est descendu, c'est le mesme qui est monté sur tous les cieux, afin qu'il remplist toutes choses. 11Lui mesme donc a donné les uns pour estre Apostres, et les autres pour estre Prophetes, et les autres pour estre Evangelistes, et les autres pour estre Pasteurs et Docteurs: 12Pour l'assemblage des Saints, pour l'oeuvre du ministere, pour l'edification du corps de Christ: 13Jusques à ce que nous nous rencontrions tous en l'unité de la foi, et de la connoissance du Fils de Dieu, en homme parfait, à la mesure de la parfaite stature de Christ. 14Afin que nous ne soyons plus enfans, flottans, et estans demeurez çà et là à tous vents de doctrine, par la piperie des hommes, et par leur ruse à cauteleusement seduire: 15Mais afin que suivans la verité avec charité, nous croissions en tout en celui qui est le chef, assavoir Christ. 16Duquel tout le corps bien ajusté et serré ensemble par toutes les jointures du fournissement, prend l'accroissement du corps, selon la vigueur qui est en la mesure de chaque partie, pour l'edification de soi-mesme en charité. 17Voici donc ce que je dis et atteste de par le Seigneur, c'est que vous ne cheminez plus comme aussi le reste des Gentils chemine en la vanité de leur pensée: 18Ayans leur entendement obscurci de tenebres, et estans estrangez de la vie de Dieu, à cause de l'ignorance qui est en eux, par l'endurcissement de leur coeur. 19Lesquels ayans perdu tout sentiment, se sont abandonnez à dissolution, pour commettre toute souilleure, à qui en feroit pis. 20Mais vous n'avez point ainsi appris Christ: 21Voire si vous l'avez escouté, et si vous avez esté enseignez de par lui, ainsi que la verité est en Jesus: 22Assavoir que vous despouilliez le vieil homme, quant à la conversation precedente, lequel se corrompt par les convoitises qui seduisent: 23Et que vous soyez renouvellez en l'esprit de vostre entendement: 24Et que vous soyez revestus du nouvel homme, creé selon Dieu en justice et vraye sainteté. 25C'est pourquoi ayans despouillé le mensonge, parlez en verité chacun avec son prochain: car nous sommes membres les uns des autres. 26Courroucez-vous, et ne pechez point: que le Soleil ne se couche point sur vostre courroux. 27Et ne donnez point de lieu au diable. 28Que celui qui desroboit, ne desrobbe plus, mais plustost qu'il travaille en ouvrant de ses mains en ce qui est bon: afin qu'il ait pour departir à celui qui en a besoin. 29Que nul propos infect ne sorte de vostre bouche: mais celui qui est bon à l'usage d'edification, afin qu'il donne grace à ceux qui l'oyent. 30Et ne contristez point le Saint Esprit de Dieu, par lequel vous avez esté seellez pour le jour de la redemption. 31Que toute amertume, et colere, et ire, et crierie, et mesdisance, soyent ostées de vous, avec toute malice. 32Mais soyez benins les uns envers les autres, pleins de compassion, et pardonnans les uns aux autres, ainsi aussi que Dieu vous a pardonné par Christ.