1א קרא-נא היש עונך ואל-מי מקדשים תפנה br 2ב כי-לאויל יהרג-כעש ופתה תמית קנאה br 3ג אני-ראיתי אויל משריש ואקוב נוהו פתאם br 4ד ירחקו בניו מישע וידכאו בשער ואין מציל br 5ה אשר קצירו רעב יאכל--ואל-מצנים יקחהו ושאף צמים חילם br 6ו כי לא-יצא מעפר און ומאדמה לא-יצמח עמל br 7ז כי-אדם לעמל יולד ובני-רשף יגביהו עוף br 8ח אולם--אני אדרש אל-אל ואל-אלהים אשים דברתי br 9ט עשה גדלות ואין חקר נפלאות עד-אין מספר br 10י הנתן מטר על-פני-ארץ ושלח מים על-פני חוצות br 11יא לשום שפלים למרום וקדרים שגבו ישע br 12יב מפר מחשבות ערומים ולא-תעשנה ידיהם תשיה br 13יג לכד חכמים בערמם ועצת נפתלים נמהרה br 14יד יומם יפגשו-חשך וכלילה ימששו בצהרים br 15טו וישע מחרב מפיהם ומיד חזק אביון br 16טז ותהי לדל תקוה ועלתה קפצה פיה br 17יז הנה אשרי אנוש יוכחנו אלוה ומוסר שדי אל-תמאס br 18יח כי הוא יכאיב ויחבש ימחץ וידו תרפינה br 19יט בשש צרות יצילך ובשבע לא-יגע בך רע br 20כ ברעב פדך ממות ובמלחמה מידי חרב br 21כא בשוט לשון תחבא ולא-תירא משד כי יבוא br 22כב לשד ולכפן תשחק ומחית הארץ אל-תירא br 23כג כי עם-אבני השדה בריתך וחית השדה השלמה-לך br 24כד וידעת כי-שלום אהלך ופקדת נוך ולא תחטא br 25כה וידעת כי-רב זרעך וצאצאיך כעשב הארץ br 26כו תבוא בכלח אלי-קבר כעלות גדיש בעתו br 27כז הנה-זאת חקרנוה כן-היא שמענה ואתה דע-לך